A soçietæ moderna a l'é ligâ streitamente à l'elettriçitæ. Pe ottegnîenergia elettrica, i umoen addeuvian ciù forme d'energia, compreiso i carburanti fòscili, l'idropotensa, l'energia eòlica, l'energia solare, l'energia chimica e l'energia atòmica, con convertî st'energia inte l'energia elettrica pe deuviâla. Tra de questi, i dispoxitivi che peuan convertî direttamente l’energia produta da-e reaçioin chimiche inte de l’energia elettrica en diti vivagne d’energia chimica (pe commun ciammæ battëie).
O sviluppo de vivagne d'energia chimica o se peu fâ vegnî da-o secolo XVIII. Do 1786 o biòlogo italian Garvani o l’à osservou pe-a primma vòtta a contraçion di moscoli de gambe de ræna inte un esperimento de disseçion de ræna e o l’à ciammou bioelettriçitæ. Dòppo, do 1800, un atro sciençiato italian, o Volta, basou in scê reçerche do Garvani, o l'à propòsto unna neuva teoria: o pensava che o strepito de gambe de ræna o fïse provocou da-a corrente generâ da-o contatto de metalli differenti. In sciâ base de st'ipòtexi, o Volta o l'à misso insemme di feuggi de zinco e de rammo alternativamente e o ê à separæ con da pelle impremuâ inte l'ægua salâ, creando coscì a primma vea vivagna d'energia chimica do mondo, a famosa pila Voltaica, comme se vedde inta figua 1-3. Do 1836, l’inventô britannico Daniel o l’à megioou o progetto de Volta e o l’à sviluppou a batteria Daniell ciù prattica. Da aloa in avanti, a tecnologia de battëie a l’é intrâ inte un periodo de sviluppo spedio, con unna serie de neuve battëie comme à ciongio açido, à zinco à manganese e à cadmio à nichel che ne vëgnan feua uña apreuvo à l’atra. Da-o comenso do secolo vinti, co-i progresci da tecnologia, l’é stæto sviluppou diversci produti avansæ pe battëie, comme de battëie à zinco d’argento, de færo à nichel, de battëie à idruro de metallo de nichel, de battëie à metallo à litio, à çellole à iòni de litio. Ste innovaçioin oua son addeuviæ pe coscì inte ciù campi differenti da soçietæ moderna.
A-o momento gh’é tante qualitæ de battëie in sciô mercou e i seu metodi de clascificaçion en despægi. In sciâ base do tipo d’elettrolito deuviou, peuan vegnî scompartii inte diverse categorie: quelle che deuvian de soluçioin açide açide comme elettroliti en ciammæ battëie açide; quelli che deuvian de soluçioin aquose alcaliñe en ciammæ battëie alcaliñe; quelli che deuvian de soluçioin aquose neutre en ciammæ battëie neutre; e e battëie che deuvian de soluçioin d’elettroliti organichi en dite battëie à soluçion d’elettroliti organichi. Pe de ciù, gh’é de battëie d’elettroliti à stato sòlido-progettæ in sciâ base d’elettroliti sòlidi; e e battëie che deuvian di sæ deslenguæ comme elettroliti en ciammæ battëie d’elettroliti à sâ deslenguou.
Ciù pe commun, e battëie en clascificæ in sciâ base de seu caratteristiche de fonçionamento e di seu meccanismi d’immagazzinamento d’energia, e pe-o sòlito s’attreuvan inte quattro categorie prinçipæ:
Battëie primmäie
(1) E battëie primmäie, conosciue ascì comme çellole galvaniche, fan referensa à unna qualitæ de battëia ch’a no peu ëse restörâ a-o seu stato de comenso dòppo a descharge pe mezo da recarrega. Sto fæto o veu dî che ste battëie peuan ëse deuviæ solo che unna vòtta. A raxon pe-a quæ e battëie primmäie no se peuan carricâ a l’é che e seu reaçioin chimiche interne en pe natua irreverscibile ò ascì se in teoria se peuan reverscibile, l’é estremamente diffiçile razzonze unna reaçion reverscibile inte de condiçioin prattiche. E battëie de zinco à manganese e e battëie à biòscido de manganese à litio en doî exempi frequenti de battëie primmäie.
Battëie segondäie
(2) E battëie segondäie, conosciue ascì comme battëie de immagazzinamento, en de battëie che peuan restörâ i seu materiali attivi interni a-o seu stato de pre-scarica pe mezo da recarrega dòppo a scarrica, permettendo coscì l’utilizzaçion çiclica. Ste battëie en deuviæ pe coscì inta vitta quotidiaña e inta produçion industriale. E battëie segondäie representative comprendan battëie à ciongio, battëie à idruro de metallo à nichel e battëie à iòni de litio.
Battëie de conservaçion
(3) E battëie de conservaçion, conosciue ascì comme battëie attivæ, en caratterizzæ da l’elettrolito e di materiali attivi de l’elettrodo ch’arrestan separæ durante l’immagazzinamento, ò che l’elettrolito o l’é inte un stato inattivo. Commensan à fonçionâ solo quande ghe n’é de beseugno, dòppo ëse stæti attivæ con l’inieçion d’elettrolito ò con di atri mezzi. Dæto che i materiali attivi de l’elettrodo poxitivo e negativo no se descargan de forma spontanea durante a conservaçion, ste battëie en ideale pe-a conservaçion à longo termine. E battëie à zinco-d'argento e e battëie à cloruro de rammo de magnesio en doe qualitæ commun de battëie de conservaçion.
Çellole à combustile
(4) E çellole à combustile, conosciue ascì comme battëie continue, an di materiali d’elettrodi inattivi che servan da ciassa pe de reaçioin elettrochimiche. I materiali attivi neçessäi pe-i elettrodi poxitivi e negativi vëgnan immagazzinæ à l’estranxeo e fornii delongo a-a batteria durante o fonçionamento, fornindo coscì unn’alimentaçion continua. E çellole à combustile comprendan pe-o ciù de çellole à combustile à membraña de scangio de protoin e de çellole à combustile alcaliñe.
In confronto à di atri tipi d'energia, e vivagne d'energia chimica son avvoxæ pe-a seu erta reisa de converscion d'energia, façilitæ de fonçionamento, erta seguessa, façilitæ de miniaturizzaçion e amixiçia con l'ambiente. Ste caratteristiche rendan e battëie indispensabile inta vitta quotidiaña e inta produçion industriale. O sviluppo de battëie d'immagazzinamento d'energia o no peu ëse separou da-o progresso soçiale d'insemme e da l'innovaçion tecnològica; a-o mæximo tempo, o sviluppo da tecnologia de battëie o promeuve ascì unn’atra esploraçion e sviluppo inti campi da produçion e scientifichi.
Pe quello, o campo de battëie d’immagazzinamento d’energia o l’à ancon de larghe prospettive de sviluppo pe tanto tempo à vegnî.